2009/12/16

Eguberriak 2009

Ibarrako Udaleko Gazteria eta Kultura sailak haur eta gaztetxoei zuzendutako programazio berezia antolatu du Eguberrietarako


2009/12/11

Blankets

Craig Thompson
Blankets
Astiberri, 2006

Komiki-eleberri hau egilearen haurtzaroan eta nerabezaroan oinarritzen da. Craig Wisconsingeko (Estatu Batuak) nekazari herri txiki batean bizi zen eta hezkuntza oso erlijioso eta gogorra izan zuen. Ikastetxean ez zen integratzen gainera eta burla eta iseka ugari jasan behar izan zituen. Testuinguru honetan egileak bere anaiarekin eta bere lehen amodioarekin izan zuen harremanean jartzen du bere arreta bekatua eta amodioa bezalako gaiak lantzeko eta komiki xume, intimo eta poetiko bat lortzeko.

Liburu honek sari ugari jaso ditu eta
Time aldizkariak eta YALSA elkarteak (Estatu Batuetako Liburuzainen Elkarteak) Estatu Batuetako urteko libururik onena izendatu zuten.



Liburutegian egilearen beste liburu bat ere badugu: Cuadernos de viaje

2009/11/30

El hombre inquieto. Henning Mankell

Henning Mankell
El hombre inquieto
Tusquets
, 2009


Kurt Wallander
poliziaren azken abentura dugu hau. Kurtek 60 urte ditu, landa-etxe txiki batean bizi da, aitona izan da eta alzheimerren lehen sintomak ditu. Baina honek ez du eragozten beste kasu zail bat argitzeko: bere alabaren aitaginarreba, Suediako marinako goi kargu ohi bat, eta amaginarrebaren desagertzea.

Hau da liburuaren aurkezpen bideoa:



Liburuaren lehen kapitulua irakurri nahi baduzue, klikatu hemen

2009/11/19

La ola

Izenburua: La Ola
Nazionalitatea: Alemania
Zuzendaria: Dennis Gansel
Antzezleak: Jürgen Vogel ...
Iraupena: 102'


Film hau benetako gertaera batean oinarritzen da: Kaliforniako eskola batean "third wave" (hirugarren olatua) izeneko esperimentu bat egin zuten 60. hamarkadan nazismoa bezalako mugimendu arriskutsuak errepikatzea oso erraza zela demostratzeko.
Filmak eszenatokia Alemaniara pasatzen du eta bertako eskola batean kokatzen du esperimentua. Reiner irakasleak Alemanian berriz nazismoa egoterik posible den aztertzen du astebete iraungo duen autokraziako irakasgaian eta ikasleen arreta erakartzeko talde bat osatuko du bere izena (La ola), liderra, uniforme, agurra eta sinboloekin. Ikasle gehienak gero eta gehiago konprometituko dira taldearekin, olatua gero eta handiagoa egingo da eta irakaslearen kontrolpetik alde egingo du.

Film honi buruzko informazio gehiago nahi baduzue klikatu hemen.


2009/11/12

Saharako ipuinak

Datorren ostegunean, azaroaren 19an, arratsaldeko 17:30ean, Miriam Mendoza ipuin kontalariak Saharako ipuinez osatutako saioa eskainiko digu Kultur Etxean.

Ekimen hau, Kultura Sailak antolatutako Kultur Trukea Hamabostaldiaren egitarauaren barnean dago.

2009/11/05

Tolosaldeako II. Emakumeen eta Inmigrazioen inguruko Komiki Lehiaketa

Hemen dituzue komiki lehiaketa honen oinarriak. Ikusteko klikatu irudietan.










2009/10/28

Iñaki Plaza & Ion Garmendia. 20 hatz proiekt

Iñaki Plaza & Ion Garmendia
20 hatz proiekt
Baga-Biga, 2009

Nahiz eta beraien lehenengo diskoa izan, Iñaki Plaza eta Ion Garmendia ibartarra ez dira hasiberri batzuk musika munduan. Urteetan Kepa Junkera, Faltriqueira, Tejedor , Ibon Koteron ... bezalako musikariekin jo dute zuzenean edo beraien diskoetan parte hartu dute. Gainera, saio didaktikoak, instrumentu ezberdinei buruzko ikastaroak eta ikasketa metodologia berriak ere landu dituzte.

Disko honetan, euskal musika eta instrumentu tradizionalak (trikitia, alboka, txistua, txalaparta ...) pvc-ko hodiak, plastikozko bidoiak edo harrizko txalaparta bezalako beste musika-tresna batzuekin nahasten dituzte, tradizioak eta esperimentazioak bat eginez eta emaitza polita lortuz.

Lupak abestiarekin egindako muntaia duzue hemen ikusgai


2009/10/26

Ipuin kontaketa

Datorren ostiralean, urriaren 30ean, arratsaldeko 6etan ipuin kontaketa saio berri bat izango dugu Ibarrako Kultur Etxean. Kontalaria Miriam Mendoza izango da eta 5-8 urteko haurrentzat kontatuko ditu bere ipuinak.

Oharra: saiora haurrak bakarrik sartuko dira.







Eusko Jaurlaritzako Kultura Saileko Liburutegi zerbitzuaren laguntzarekin antolatutako saioa.

2009/10/14

Europa iparraldeko nobela

Europa iparraldeko nobela beltzak izugarrizko "booma" izan du batez ere Stieg Larsson idazle suediarraren Millenium trilogiari esker. Nobela hauek munduko herrialde aurreratuenetan gertatzen diren arazo sozialak dituzte oinarrian eta bertako protagonistak pertsona normalak dira, ez da polizia superheroirik agertzen. Egungo arazoez gain, bertako kultura, ohitura, gizartea eta bizimodua ezagutzeko ere aproposak dira.

Liburutegian idazle eta liburu hauek aurkitu daitezke:


Maj Sjöwall eta Per Wahlöo (Suedia):

- Roseanna
- El hombre que se esfumó

Henning Mankell (Suedia):

- Asesinos sin rostro
- La quinta mujer
- Cortafuegos
- El chino
- El retorno del profesor de baile
- Antes de que hiele
- El hijo del viento
- El cerebro de Kennedy


Liza Marklund (Suedia):

- Studio sex

Arnaldur Indridason (Islandia):

- Las marismas
- La mujer de verde

Jo Nesbo (Norvegia):

- Petirrojo

Camilla Lakcberg (Suedia):

- La princesa de hielo
- Los gritos del pasado
- Las hijas del frío

Asa Larsson (Suedia):

- Aurora boreal

2009/09/28

Reservoir dogs. Quentin tarantino

Izenburua: Reservoir dogs
Zuzendaria: Quentin Tarantino
Antzezleak: Harvey Keitel, Tim Roth, Chris Penn, Steve Buscemi, Lawrence Tierney, Michael Madsen
Jatorria: AEB, 1992

Aurtengo Donostiako Zinemaldiko izar nagusienetakoa izan den Quentin Tarantino zuzendari ospetsuaren lehen filma izan zen hau. Orduan inork gutxik ezagutzen zuen eta film honen estreinaldiak izugarrizko ustekabekoa suposatu zuen.

Filmak porrot egiten duen lapurreta bat kontatzen digu: elkarren artean ezezagunak diren eta asmatutako izenak dituzten sei lagun bitxi-denda bat lapurtzeko kontratatzen dituzte. Dena zehatz-mehatz prestatu dute baina polizia azaltzen da eta lapurreta zapuzten du. Badirudi traidore bat dagoela eta bizirik gelditzen diren lapurrak zein den jakiteko bilduko dira.

Film honetan Tarantinoren ibilbidean errepikatuko diren ezaugarriak azaltzen dira: biolentzia, elkarrizketa zorrotzak, musikaren garrantzia ...

Zuzendari hau gustokoa baduzue, film hauek ere baditugu liburutegia:
Hau da Reservoir dogs filmaren trailerra


2009/09/10

II. Ibarra Galtzakomik komiki lehiaketa 2009

Lehiaketaren oinarriak ikusi nahi badituzu, klikatu irudietan.


2009/09/07

Bone

Bone
Jeff Smith
Astiberri

Boneville herritik kanporatuak izan ondoren, bone arrazako Fone, Phoney eta Smiley lehengusuak galdu egiten dira basamortuan eta banaka, baso eder batera iritsiko dira. Hemen Thor neska ederra eta bere amona bitxia ezagutuko dituzte eta abentura izugarriak izango dituzte basoko pertsonai beldurgarri baina oso azkarrak ez diren mostrorratekin.

Fantasia eta abenturazko komiki hau 90. hamarkadan hasi zen argitaratzen, berehala arrakasta handia izan zuen eta 40 sari baina gehiago jaso zituen, klasiko batean bihurtuz. Astiberri argitaletxeak 9 liburuxketan bildu du eta koloretan argitaratu du (jatorrizkoa txuri-beltzean zen).

Lehenengo kapitulua ikusi nahi baduzu, klikatu hemen

2009/07/24

Nora ez dakizun hori. Irati Jimenez

Nora ez dakizun hori
Irati Jimenez
Elkar

Hau da irakurle batek liburu honetaz pasa digun komentariotxo ezin hobea:

"Oso ondo pasa dut liburu hau irakurtzen. OSO ONDO. Banpiroak, likantropoak, istorio gurutzatuak, mundua eskura (leku ezberdinak ezagutzeko aukera), artea ... eta batez ere idazteko era (egitura) ... zoragarria"

Hemen duzue Sautrela saioan idazleari eginiko elkarrizketa


2009/07/02

Mailegatuenak

2009ko lehen sei hilabeteetan helduen artean mailegatuenak hauek izan dira:

Liburuak

11 aldiz. Bilbao-New York-Bilbao. Kirmen Uribe
10 aldiz. La flor de la argoma. Toti Martínez de Lezea
9 aldiz. El chino. Henning Mankell
Los hombres que no amaban a las mujeres
. Stieg Larsson
Zoaz infernura, laztana
. Andu Lertxundi




DVD-ak


17 aldiz. Napola: Escuela de élite nazi.
14 aldiz. American ganster.
12 aldiz. Promesas del este.
Deseo, peligro
.
Irina palm
.
Hacia rutas salvajes
.
Juntos, nada más
Cuatro minutos
.
Sophie Scholl: Los últimos días

CD-ak

9 aldiz. Malko Gorria. Sugan
8 aldiz. Viva la vida or Death and all his friends. Coldplay
7 aldiz. Itsas ulu zolia. Benito Lertxundi
Materia organiko eta gainerakoak
. Kerobia
As I am
. Alicia Keys

2009/06/29

Udarako ordutegia

Jada udarako ordutegiarekin ari gara lanean liburutegian. Ordutegia hau da:


Ekainak 22- uztailak 30:
9:30-14:00
Abuztua:
Itxita
Irailak 1-4:
9:30-14:00


Gogoratu udaran mailegua zure beharretara egokitzen dugula

2009/06/11

Mendi ibilaldiak

Badirudi eguraldi ona iritsi dela eta giroaz, mendiaz eta naturaz gozatzeko aukera dugula. Horretarako azkenaldian erosi ditugun liburu eta DVD hauek proposatzen dizkizuegu:

Parque Natural de Valderejo: ascensiones, excursiones
Iñigo Muñoyerro, Fernando J. Pérez
SRB

Arabako naturgune honetako txoko ezberdinak ezagutzeko aukera ematen du liburu honek famili giroan egiteko ibilaldi errazak edo mendi igoera zailagoak eskainiz.

Montes de Gipuzkoa
Iñaki Alcalde, Jesús M. Pérez Azaceta
Sua

Herrialdeko 143 tontorren igoerak deskribatzen ditu.


Euskal Herria basatia
Mikel Tellagorri
Sua

Euskal Herriko baso eta ibarrak, itsasertza, labarrak eta haitzarteak, tontor nagusiak, ibaiak eta ur-jauziak ezagutzeko aukera ematen du.


Trekking por la costa vasca
Ander Izagirre
Sua

Euskal kostaldeak dituen 225 kilometroak 13 etapetan egitea proposatzen du.



El Pirineo Navarro: 50 itinerarios
Rufo Ganuza
El senderista

Zaraitzu, erronkari edo Zuriza bezalako leku ederrak ezagutzeko parada ematen duen liburua. Ibilbide ezberdinek informazio zehatza dute: zailtasuna, iraupena, kartografia ...


Ideas para el fín de semana: travesías de montaña y propuestas culturales

El Mundo de los Pirineos

Pirinioetan zehar 2 eta 3 egunetan egiteko ibilaldiak proposatzen dizkigu El Mundo de lo Pirineos aldizkariko zenbaki berezi honek, baina oraingo honetan ibilaldi bukaerako herrietako leku esanguratsuenak bisitatzea ere gomendatzen digu.


Pirineum
Aneto publicaciones

14 DVDz osatutako bilduma honetan Piriniootaz informazio asko ematen zaigu: lehenengoan nola sortu ziren eta zein aldaketa izan dituen azaltzen zaigu, baina bestetan bailara eta mendi ezberdinak erakusten zaizkigu betiere irudi ederrekin hornituta eta bailara bakoitzaren berezitasunak, kultura eta ohiturak adieraziz.

2009/06/04

Oporretarako irakurketak

Zuen gustukoak izango direlakoan, oporretan irakurtzeko aproposak izango diren liburu berri batzuk aurkezten dizkizuegu adinaren arabera sailkatuta.

0-8 urtekoentzat




8-12 urtekoentzat




12-16 urtekoentzat


2009/05/27

Joan as Police Woman. To survive

Joan as Police Woman
To Survive
Pias

Joan Wasser, hau da bere benetako izena, oso txikitatik hasi zen biolina eta pianoa jotzen. Gaztetan talde ezezagun batzuen partaide izan ondoren, artista esanguratsu batzuen laguntzaile gisa egin zen ezagun. Nirvana, Nick Cave, Lou Reed, Antony & the Johnsons edo Rufus Wainwright bezalako taldeekin lan egin ondoren hasi zen bere bakarkako ibilbidea, To Survive bere bigarren diskoa delarik.

Disko honetan piano soinuak dira nagusi. Soula, popa eta jazza nahasten ditu abesti goxo eta lasaiak eginez, beti ere sentimendu ezberdinei buruz hitz eginez, batez ere maitasunari buruz.

2009/05/14

El violonchelista de Sarajevo

El violonchelista de Sarajevo
Steven Galloway
El Aleph

Nobela honek benetako gertaera bat hartzen du abiapuntutzat: Sarajevoko Filarmonikako Vedran Smailovíc biolontxelo joleak okindegi batean 22 pertsona hiltzen ikusi zituen bonbardaketa batean eta haien ohorez 22 egunez kalean Albinoniren Adagioa jo zuen. Oinarri honekin, liburuak gerra garaian Sarajevon bizi diren 3 pertsonaien eguneroko bizitza erakutsiko digu, beraien pentsaera, beldurrak eta sentimenduak, baina baita ere gerraren ondorioak oso era errealistan.

Hemen Tomaso Albinoniren "Adagio in G minor" entzuteko aukera duzu

2009/05/11

Ipuin kontaketa


Datorren ostegunean, maiatzaren 14ean, arratsaldeko 5.00etan ipuin kontaketa saio berri bat izango dugu Ibarrako Kultur Etxean Idoia Sanchezen eskutik.
Saioa Galtzaundi Euskara Taldeak antolatu du.

2009/05/08

Una historia violenta

Una historia violenta
Gidoia: John Wagner
Marrazkiak: Vince Locke
Argitaletxea: Astiberri

Tom McKena gizon arrunt bat da, herri txiki bateko kafetegi batean lan egin eta familia bat osatu duena. Baina dena aldatu egingo da bere lantokian lapurreta bat egiten saiatzen direnean eta berak gaizkile arriskutsuei aurre egiten dienean. Gauetik goizera heroi bat bihurtzen da eta ondorioz, telebista eta egunkariak direla medio, gizon ezaguna. Honek bere iraganari aurre egitea behartuko dio bere bizitza xumea alde batera utziz.
Komiki honek mendekuaz eta bizirik irauteaz hitz egiten digu, horretarako indarkeria eraibili behar bada ere.

Una historia de violencia izenburuarekin, liburu honetan oinarrituta film bat egin zen. Zuzendaria David Cronemberg da eta aktore nagusiak berriz Viggo Mortensen, William Hurt eta Ed Harris.

2009/04/28

Altxor uhartea

Altxor uhartea
Robert Louis Stevenson
Elkar

Stevensonek 1883an argitaratu zuen liburua baina lehenago gazteentzako aldizkari batean argitaratua izan zen emanaldi ezberdinetan. Hala ere liburuak bere semeordeari kontatzen zizkion ipuinetan du jatorria, ipuin-kontaketa horietako baten uharte bat marraztu baitzuten eta hori izango zen gero Altxor uhartea izango zenaren oinarria.
Liburuaren protagonista Jim Hawkins gaztea da. Berak kontatuko digu nola bilatuko duten urruneko uharte batean Flint kapitain piratak urte askotan itsasontziak hondoratuz eta gizon asko hilez pilatutako altxor handia. Baina horretarako John Long Silver piratari aurre egin beharko diote Jim eta bere lagunek.
Eleberri honek izugarrizko eragina izan zuen ondorengo pirata istorioetan, hemen azaltzen diren elementu asko gero errepikatu egingo baitira: piraten egurrezko hanka, loro hiztunak, itsasontziko matxinadak, altxorra aurkitzeko mapa ...
Gazte eta helduek ondo pasatzeko eginiko abenturazko eleberria eta helduen munduan sartzera doan gazte baten istorioa dela esan dezakegu laburbilduz.

2009/04/23

Liburuaren eguna 2009

Liburuaren eguna dela eta, Nafarroako Liburuzainen Elkarteak (ASNABIk)"Herri liburutegiak denontzat, denok den-denak garenean" manifestua atera du jasaten ari diren zentsura eta esku-hartze politikoa salatzeko. Manifestua hemen klikatuz irakurri daiteke. Dena den, Montxok eta Zaldieroak Berrian argitaratu dituzten zintek argi erakusten dute zein den egoera.








2009/04/20

Komiki berriak

Hauek dira erosi ditugun azken komikiak:

2009/04/08

Pazko astea 2009

Hau da Kultura sailak pazko asterako antolatu duen egitaraua

2009/04/03

Antes que el diablo sepa que has muerto

Izenburua: Antes que el diablo sepa que has muerto
Zuzendaria: Sidney Lumet
Antzezleak: Philip Seymour, Ethan Hawke, Marisa Tomei ...
Jatorria: AEB, 2008

Diru asko zor duten bi anaiek lapurreta errez bat egitea pentsatzen dute gurasoen bitxi-dendan: ez dute biolentziarik erabiliko, pistolarik ere ez eta aseguruak gurasoei ordainduko die lapurtutakoaren balioa. Baina dena gaizki ateratzen da. Porrot honek nola eragingo duen bi anai eta aitarengan ikusiko dugu.

Kritiko batzuentzat 2008ko filmerik hobena izan zen hau.


2009/03/31

Apirilak 2: Haur Liburuaren Nazioarteko Eguna

1965. urtea geroztik, IBBYk (International Board on Books for Young People) Hans Christian Andersen idazlearen jaiotza goraipatzeko Haur Liburuaren Nazioarteko Eguna ospatzen du apirilaren 2an. Hori dela eta, IBBYko sail batek egun hau iragartzeko kartel eta mezu bat idazten du, aurten Egiptoko saila izan delarik lan hau egin duena.

Hani D. El-Masri margolariak egindako kartela eta idatzia hauek dira:


Ni naiz mundua

Ni naiz mundua, eta mundua ni naiz
zer nahi huraxe bainaiz
neure liburuaren bidez.

Hitzek eta irudiek, hitz lauz edo bertsotan,
gertura naramate, eta urrun aldi berean.

Sultanen eta urrearen lurraldean
milaka istorio daude ipuinetan:
alfonbra hegalariez, kriseilu
miresgarriez…
Jeinuek, demonioek eta sinbadek
beren sekretuak dizkiote Xerezaderi

Orrialde bakoitzean hitz bakoitzarekin
espazioan eta denboran zehar noa bidaian.
Eta fantasiaren hego gainean
dabil nire gogoa
lehorrean eta itsasoan.
Gehiago irakurri ahala, hobeto ulertzen dut
beti nagoela nire liburuarekin
konpainia onean

Beste hizkuntza batzuetan irakurri nahi baduzu, klikatu hemen

2009/03/17

Baratza etxean


La huerta en casa
Usoa Arin
Txertoa

Baratzantza gustatzen bazaizu baina ez baduzu lurrik baratza bat edukitzeko, hau da zure aukera. Liburu honen bidez zure etxeko balkoi edo terrazako loreontzietan ereindako barazki goxoak jan ahal izango dituzu eta gainera era ekologiko batean ekoiztuak.

Usoa Arin agronomoak baratza bat nola lortu etxean erakusten digu: zer lur mota erabili, konposta nola ekoiztu, gaixotasunei nola aurre egin eta azkenik, laborantza mota honetara egokitzen diren barazkien deskribapena egiten du.

Baratzantza edo balkoiko ekoizpena interesatzen bazaizu, liburu hauek ere baditugu liburutegian:

2009/03/10

Río abajo / Arrugas

Río abajo
Pascal Rabané
Norma

Emile gizon edadetua eta alarguna da, bizitza oso monotonoa daramana: tabernan egon lagunekin eta arrantza egitea dira bere eguneko eginbeharrak. Baina berarekin arrantzara joaten zen laguna hiltzen denean eta honek zeraman bizitza sekretua nabarmentzen denean bere egoerari buruzko hausnarketa egiten du eta pixkanaka bizimoduaz aldatzen hasten da, gauza berri eta ezberdinak probatuz.

Komiki atsegin eta baikor honek Frantziako Kritikarien saria jaso zuen 2007an.

Arrugas
Paco Roca
Astiberri

Aurreko komikiak irribarre batekin usten bagaitu, honek zer pentsatua emango digu berriz. Komiki honen protagonista Emilio da, hau ere edadetua eta alarguna da baina gaixo dago eta erresidentzia batean sartzen dute alzheimerri aurre egiteko. Komikian protagonistaren oroimen galtzearen prozesua jarraituko dugu eta errealitatean oinarritutako pasadizo batzuen bitartez beste gaixoak eta erresidentziako bizitza ere ezagutuko ditugu. Nahiz eta gai gogorra izan, egileak umorea erabiltzen du desdramatizatzeko eta komiki sentikor, atsegin eta errealista egiteko.
Komiki honek Espainiako Sari Nazionala jaso zuen iaz.