Hauts bihurtu zineten

Juan Kruz Igerabideren Hauts bihurtu zineten (Alberdania) Beterriko Liburu izendatu dute.

Urtero legez, Beterriko Liburua literatur ekimeneko epaimahai orokorreko kideek eta beste hainbat irakurlek eman dute botoa. Hirurogei kidek osatzen du, urtean zehar, liburuen iruskinak egiten eta aipamenerako botoa ematen duen Epaimahai Orokorra. Beterri-Aiztondo bailarakoak (Andoain, Aduna, Zizurkil, Billabona ...) dira epaimahaikide gehienak.

Epaimahaiaren aburuz liburu sarituak jasotako merezimenduak hauek izan dira:

• Gaiaren gazi-gozoak baino areago, pertsonaien izaera ondo taxutua gailentzen da, baita euren arteko harreman sarea ere. Ondo baino hobeto harilkatu ditu liburuko protagonisten nortasunak, pentsaerak, bizipenak.
• Kontaketaren erraietan sartzea erraza bezain atsegina egin du Igerabidek. Hizkuntza goxoa darabil, txukuna eta zaindua. Hitz-joko ugari tartekatu du, eta elkarrizketetan, naturaltasunaren xarma gailentzen da.
• Frankismo garaiko eta ondorengo urteetako egoera sozio-politikoaren hausnarketa sendoa eskaintzen du liburuak, Adunaren ispilu den herri txiki bateko biztanleen azaletik egina.
• Liburuan zehar, modu orekatuan mantendu du tonu goxoa, lasaigarria. Azken puntura iritsita, barealdia sumatuko du irakurleak ere. Gustuko sentipena.

Hauexek irakurleen eskutik jasotako emaitza nagusiak:

1. Hauts bihurtu zineten (Juan Kruz Igerabide): 16 boto
2. Vredaman (Unai Elorriaga): 6 boto
3. Gaur ere ez du hiltzeko eguraldirik egingo (Iñaki Segurola): 6 boto
4. Neguko zirkua (Harkaitz Cano): 5 boto
5. Sua nahi, Mr. Churchill? (Koldo Izagirre): 5 boto
   

Iturria: http://www.larramendi.org/